امریکی صدر ڈونلڈ ٹرمپ نے دعویٰ کیا ہے کہ 90 فیصد امکان ہے کہ ایرانی سپریم لیڈر مجتبیٰ خامنہ ای زندہ نہیں ہیں۔
ڈونلڈ ٹرمپ نے امریکی میڈیا کو انٹرویو دیتے ہوئے کہا ہے کہ ایران کی فوجی صلاحیتوں کو شدید تنزلی کا سامنا ہے۔
اُنہوں نے مزید کہا کہ ایران کی بحریہ، فضائیہ، اینٹی ایئر کرافٹس سب ختم ہو گئے۔
امریکی صدر نے یہ بھی کہا کہ ایران کے تمام رہنما مارے جا چکے ہیں، ان کے بہترین لیڈر مارے گئے ہیں اور 90 فیصد امکان ہے کہ ان کا بیٹا مجتبیٰ خامنہ ای بھی زندہ نہیں ہے۔
واضح رہے کہ ایران کی جانب سے مجتبیٰ خامنہ ای کے بارے میں یہ بتایا گیا ہے کہ وہ فضائی حملے میں زخمی ہونے کے بعد زیرِ علاج ہیں۔
ایرانی سپریم لیڈر رواں ماہ ایران اور عراق میں منعقد ہونے والی اپنے والد کی آخری رسومات میں شریک نہیں ہوئے تھے۔
امریکی صدر ڈونلد ٹرمپ نے ایران پر آج پھر شدید حملوں کا اعلان کیا ہے۔
ریڈیو میزبان ہیو ہیوٹ سے گفتگو میں ڈونلڈ ٹرمپ نے کہا کہ ہم وسطی ایران کے کوہ کولانگ گاز لا کو نشانہ بنانے جارہے ہیں۔
ڈونلڈ ٹرمپ نے کہا کہ ایران مفاہمتی یادداشت ایک آزمائش تھی، ایران نے اس کی پاسداری نہیں کی۔
امریکی صدر کا کہنا تھا کہ میری نیتن یاہو کے ساتھ بہت اچھی ہم آہنگی ہے اور ہمارے تعلقات خوشگوار ہیں۔
ان کا کہنا تھا کہ میں بعض اوقات نیتن یاہو سے اختلاف کرتا ہوں لیکن انہیں اپنے اختلاف سے آگاہ بھی کردیتا ہوں۔
واضح رہے کہ گزشتہ روز امریکی صدر ڈونلڈ ٹرمپ نے آبنائے ہرمز کی دوبارہ ناکہ بندی کا اعلان کیا تھا۔
