وزیر مملکت برائے داخلہ طلال چوہدری نے کہا ہے کہ پیپلزپارٹی اور پی ٹی آئی کے اتحاد کا امکان ہے نہ ہی حکومت کو کوئی خطرہ ہے۔
وزیر مملکت برائے داخلہ طلال چوہدری نے جیونیوز کے پروگرام آج شاہ زیب خانزادہ میں گفتگو کرتے ہوئے کہا کہ ڈھائی سال بعد حکومت کی الٹی گنتی شروع ہوجاتی ہے، اسی طرح 5سال پورے ہوجائیں گے۔ اتحاد بھی اسی طرح چلے گا یہ احساس پیپلزپارٹی کو ہے اور مزید احساس بھی ہوجائے گا۔
ان کا کہنا تھا کہ پاکستان اور سسٹم کے مفاد میں بھی یہی ہے کہ موجودہ اتحاد اسی طرح چلتا رہے۔ پیپلزپارٹی اور پی ٹی آئی کے اتحاد کا امکان ہے، نہ ہی حکومت کو کوئی خطرہ ہے۔
طلال چوہدری نے بانی پی ٹی آئی عمران خان کے بیٹوں کے اس دعوے کی تردید کردی کہ ان کے پاکستانی شناختی کارڈ ایکسپائر ہوچکے ہیں اور کہا کہ ان کے بیٹے ڈیجیٹل آئی ڈی لے کر بھی پاکستان آسکتے ہیں، وہ آئیں توہم ملاقات کروادیں گے۔
وزیر مملکت برائے داخلہ طلال چوہدری کا کہنا تھا کہ پی ٹی آئی کا مزاج سیاسی نہیں ہے، جب تک ان کے سیاسی لوگ سیاسی فیصلے نہیں کریں گے کسی تحریک کا کوئی نتیجہ نہیں نکلے گا،ان کے پاس تمام آپشن ختم ہونے کے بعد اب ہمدردی کارڈ رہ گیا ہے۔
